Паважаныя карыстальнікі! Паведамляем вам, што фонд Іўеўскай раённай бібліятэкі папоўніўся рарытэтнымі выданнямі: дзякуючы пробашчу касцёла Святых апосталаў Пятра і Паўла ксяндзу Паўлу Калесніку былі атрыманы 14 кніг з уласнай бібліятэкі І.Бобіча (падцверджаных экслібрысам).

Нагадаем, што на працягу многіх гадоў супрацоўнікі Іўеўскай раённай бібліятэкі вядуць пошукава-даследчую работу па збору, сістэматызацыі, афармленню і папулярызацыі матэрыялаў пра легендарных асоб, якія ўнеслі значны ўклад у гісторыю і культуру Іўеўшчыны. З цягам часу імёны гэтых людзей забываліся, і мала хто з нашых сучаснікаў ведае пра іх. Адна з такіх асоб – былы ксёндз Іўеўскага касцёла святых апосталаў Пятра і Паўла, асветнік, доктар філасофіі, беларускі празаік, публіцыст, перакладчык Ільдэфонс Бобіч. Беларус па паходжанні, святар і літаратар па прызванні, ён шырока прапагандаваў беларускую мову дзеля адраджэння і росквіту роднай зямлі. У літаратурным асяроддзі пачатку ХХ стагоддзя быў вядомы пад псеўданімам Пётра Просты.

У працэсе знаёмства з архіўнымі дакументамі і ўспамінамі сучаснікаў святара бібліятэкары даведаліся, што ў яго была вялікая бібліятэка кніг XVIII-XIX стагоддзяў з асабістым экслібрысам. Пасля смерці Ільдэфонса Бобіча большая частка выданняў была спалена, іншыя – разабралі людзі. У выніку пошукава-даследчай дзейнасці супрацоўнікамі бібліятэкі былі знойдзены 14 кніг з бібліятэкі І.Бобіча. Яшчэ 2 кнігі Іўеўская раённая бібліятэка атрымала ў 2020 годзе ў падарунак ад вядомага земляка – доктара гістарычных навук, прафесара, першага прарэктара ДУА “Мінскі гарадскі інстытут развіцця адукацыі” Сяргея Пятровіча Стрэнкоўскага.

Работа па выяўленню месцазнаходжання іншых выданняў з бібліятэкі І.Бобіча і збору дакументаў пра легендарных асоб Іўеўскага краю працягваецца.

Будзем вельмі ўдзячны за дапамогу ў пошуку.