25 сакавіка ў Іўеўскай раённай бібліятэцы адбылося пасяджэнне дзіцячага аматарскага аб’яднання “PRO-кнігі”. У рамках агульнаадукацыйнага абласнога праекта “Аб чым не паведаміў падручнік” бібліятэкар падрыхтавала гістарычнае падарожжа “Зямля пад белымі крыламі”.

Пачалося мерапрыемства з гутаркі пра вялікую і малую Радзіму, пра наш народ і яго гісторыю, пра беларускіх аўтараў, якія прысвячалі свае творы роднаму краю.

У ходзе пасяджэння дзеці даведаліся шмат цікавага пра жыццё і творчасць беларускіх пісьменнікаў Навума Гальпяровіча і Уладзіміра Карызны, якія ў гэтым годзе адзначаюць юбілеі. Удзельнікі мерапрыемства пазнаёміліся з творамі юбіляраў, прадстаўленымі на кніжнай выставе, праслухалі ўрывак «Бацька гарадоў беларускіх» (паводле твору Н.Гальпяровіча), даведаліся пра значэнне новых для іх беларускіх слоў (выспа, дойлід, строма і інш.), чыталі і абмяркоўвалі вершы Навума Гальпяровіча і Уладзіміра Карызны, прысвечаныя тэме Радзімы.