“Пісьменнік адзначае юбілей”: І.А. Карэнда

Акраец  хлеба  і  глыток  вады,
Святло  кахання  і  букет  рамонкаў
Дала  ў  дарогу  мне  на  шчасце  ты,
Мая  Айчына,  родная  старонка.

Ці  ўдзячны  я  за  шчодры  мой  надзел,
За  спадчыну  багатую  такую,
Ці  радуе  пражыты  мною  дзень
Тваю  душу,  што  рэдка  не  смуткуе?

Твой  сын,  я  мушу  шчырым  быць  заўжды,
Аплачваць  працай  твой  крэдыт  даверу
І  засланяць  сабою  ад  бяды
Цябе  ў  часіны  непагадзі  шэрай.

І.А. Карэнда “Бацькаўшчыне”

Да 75-годдзя з дня нараджэння нашага земляка – выдатнага пісьменніка і грамадска-культурнага дзеяча Івана Арсеньевіча Карэнды ў Іўеўскай раённай бібліятэцы падрыхтавана выстава “Пісьменнік адзначае юбілей”. 

І.А.Карэнда нарадзіўся ў вёсцы Крывічы Іўеўскага раёна ў сялянскай сям’і, прайшоў вялікі прафесійны шлях ад школьнага настаўніка да высокіх дзяржаўных пасадаў (працаваў начальнікам галоўнага ідэалагічнага ўпраўлення Адміністрацыі Прэзідэнта Рэспублікі Беларусь, саветнікам Пасольства Рэспублікі Беларусь у Расійскай Федэрацыі і інш.).

І ўвесь час Іван Арсеньевіч заставаўся чалавекам, які вельмі тонка адчувае літаратурную творчасць, жыве душэўнымі памкненнямі. Яго непарыўная сувязь з роднай зямлёй, любай вёскай увасобілася ў мастацкім слове.

Першыя вершы І.А. Карэнды публікаваліся ў Шчучынскай раённай газеце “Савецкая вёска” (1971 г.), з 1975 года ён друкаваўся ў рэспубліканскіх выданнях. Іван Арсеньевіч – аўтар зборнікаў лірыкі: “Белы наліў”, “Знічка”, “Васількі надзеі”, “Апошняя малітва”, “Пад зорным небам верасня”; паэм “Вочап” і “Бярозавік”; паэтычных кніг для дзяцей: “На загадкі ёсць адгадкі”, “Ёж иголки продавал”, “Азбука Перамогі”; кніг прозы: “Воплаўская госця”, “Усміхніся шчасцю свайму”, “Жыць для Беларусі. Шлях суддзі Іосіфа Бойсы” і іншых выданняў.

У сваіх творах пісьменнік заклікае чытача зазірнуць ва ўласную душу, задумацца над сэнсам жыцця, вечнымі каштоўнасцямі, нагадвае аб адказнасці чалавека за свае паводзіны і ўчынкі, за будучыню роднай Беларусі.

Запрашаем усіх жадаючых наведаць выставу “Пісьменнік адзначае юбілей” і пазнаёміцца з творчасцю нашага вядомага земляка.

IMG_20250916_160133
“Пісьменнік адзначае юбілей”: І.А. Карэнда

Кніга працягвае серыю твораў айчыннай дзіцячай літаратуры пра беларускі алфавіт. У аснову вершаў аўтар паклаў факты жыццёвай біяграфіі свайго дзеда-франтавіка, удзельніка Вялікай Айчыннай вайны Івана Мікалаевіча Карэнды. Выданне прымеркавана да 80-годдзя Вялікай Перамогі.

Карэнда І. Шлях суддзі

Гэта дакументальная аповесць прысвечана светлай памяці ўраджэнца Іўя Іосіфа Браніслававіча Бойсы – юрыста-прафесіянала, кіраўніка Лідскага раённага суда і вельмі сціплага, духоўна багатага чалавека, які бязмежна любіў родны край і пакінуў на ім свой адметны след. Сярод яго заслуг – гарадскія куранты на высокай вежы Іўеўскага касцёла і вялікі гранітны камень ля ўваходу ў храм з выявай знакамітай іконы Маці Божай Вастрабрамскай і сімвалічным надпісам “Любі Айчыну сваю. Рабі дабро. Адказвай перад Богам”.

photo_8_2025-06-11_11-58-45

Новая кніга Івана Карэнды «Усміхніся шчасцю свайму» — гэта не проста эмацыйная проза, але і своеасаблівае падарожжа праз лёсы і ўрокі жыцця. Вы даведаецеся гісторыю Аляксандра Паруліка — адзінокага хлопца з парушэннем маўлення, які становіцца ўпэўненым у сабе чалавекам, стварае сям’ю і паспяхова будуе кар’еру. Ён праходзіць шлях страт і пакут і ўрэшце знаходзіць сваё месца ў свеце. Пазнаёміцеся з натхняльным аповедам пра тое, як моцнае каханне можа адрадзіць чалавека ў сталым узросце. Адносіны беларуса Івана і расіянкі Ірыны — вір пачуццяў, які перайначвае лёс абаіх, выпрабоўваючы часам і адлегласцю. Калі вы любіце творы, дзе кожная старонка дыхае душэўным настроем, — гэтая кніга для вас. Яна прыгадае: нават тады, калі жыццё здаецца чорна-белым, усміхніцеся — і колеры вернуцца.