Віктар Канстанцінавіч Шарэцкі (05.12.1925, мястэчка Дзяляцічы Навагрудскага раёна Гродзенскай вобласці — 22.10.1993) – беларускі дзеяч самадзейнага мастацтва, харавы дырыжор, кіраўнік Бараўскага народнага хору, удзельнік партызанскага руху падчас Вялікай Айчыннай вайны, узнагароджаны Ордэнам Айчыннай вайны ІІ ступені, медалямі. Заслужаны работнік культуры Рэспублікі Беларусь (1977).

Нарадзіўся ў сялянскай сям’і.  У 1939 годзе скончыў сямігодку ў Дзяляцічах.

З канца 1942 года — ваяваў у партызанскім  атрадзе “Мсцівец” (быў падрыўніком).

У 1944-1950 гг. — служыў у войску.

Пасля заканчэння службы працаваў загадчыкам клуба ў Дзяляцічах, дзе кіраваў  мясцовым хорам (у 1950-1954 гг.).

Ажаніўшыся, жыў у в. Барава Іўеўскага раёна. У 1951-1986 гг. — выкладаў музыку, спевы, маляванне ў Бараўскай васьмігадовай, затым сярэдняй школе.

Завочна скончыў Гродзенскае музычна-педагагічнае вучылішча (1969 г.).

У 1951-1889 гг. Віктар Канстанцінавіч Шарэцкі кіраваў Бараўскім хорам, які выступаў у розных мясцінах Беларусі і за яе межамі. У  1965 годзе хор атрымаў званне “народнага”. У калектыве творча развіваліся мясцовыя песенныя традыцыі.