Пахаваны партызан Баранавіцкага злучэння Сямён Дзмітрыевіч Жарыкаў. 

Нарадзіўся ў 1918 г. у в. Галавенчыцы Чавускага раёна Магілёўскай вобласці. 

Воінскае званне: старшы сяржант, быў камандзірам аддзялення партызанскага атрада “Беларускі мсціўца” брыгады “Уперад”. 

Загінуў 20 сакавіка 1944 года. Пахаваны на могілках у в. Песевічы. У 1967 годзе на магіле быў устаноўлены помнік. 

Узнагароджаны: Указам Прэзідыума Вярхоўнага Савета СССР ад 30 снежня 1948 года Жарыкаў Сямён Дзмітрыевіч пасмяротна быў узнагароджаны ордэнам Айчыннай вайны II ступені.

За час знаходжання ў партызанскім атрадзе “Беларускі мсціўца” С.Д. Жарыкаў прымаў удзел у падрыве двух варожых эшалонаў, у баі па знішчэнні бела-польскай банды ў вёсцы Ізабелін 24 лютага 1944 года.

20 сакавіка 1944 г. камандзірам атрада Жарыкаў Сямён Дзмітрыевіч быў адпраўлены з данясеннем да камандзіра брыгады. Па дарозе трапіў у нямецкую засаду і быў паранены ў абедзве нагі. Не жадаючы патрапіць у палон жывым, ён падарваўся на ручной гранаце.